又一套續集無法突破宿命 ( ” 無首集咁好睇 ” ) 。第一集雖然天馬行空，尚可自圓其說。大逃殺 II 就令觀眾有一大堆疑問：
(1) 遊戲目標
” 殺死上集男主角七原秋也 ” – 咁七原死了下次點算，再立法 BR3 ？仲有，如果找不到七原的基地又如何？暫緩執行 BR2 ？
(2) 戰術
班成年人傻既，知道七原的藏身地點都仲要等班學生去送死之後再派特種部隊？一早就圍剿啦。七原仲要係國際級恐怖份子，俾其他大國知道咪變外交風波？
(3) 佈景
七原秋也興建一個咁既基地都唔知做乜？由外觀至內部設計全無實用價值，特種部隊要死咁多人才攻進去都算失敗。
(4) 結局
都唔好提七原同男主角點樣在得一支 AK-47 同一支左輪既情況下殺出重圍，但係點解係都要去阿富汗集合？
首集其實一樣有好多疑點，但劇情緊湊，角色死相令觀眾目不暇給。根本無時間去想那些疑點。今集班學生經常大量犧牲，以致有好多冷場出現，俾觀眾機會去諗無謂野。
今集最令我意想不到的是編劇竟然引入反美意識。很想知道本片能否在美國公映，而美國的反應又會如何？
此片相信只可吸引嗜血人士。雖然各人的死法有欠新鮮，但導演對血漿絕不吝嗇，經常 ” 兜口兜面 ” 潑向觀眾。
總而言之，睇多次第一集好過。